VIDEO: Background am Gespréich vum 14. OktoberLaurent Schonckert iwwer 50 Joer Cactus

Invité dëse Samschdeg am Background am Gespréich war den Administrateur-directeur vum Groupe Cactus, de Laurent Schonckert.

Radio - Background: Laurent Schonckert (14.10.2017)
Eng Stonn, fir hannert d'Kulissen ze kucken.

De Groupe Cactus feiert dëst Joer säi ronne 50. Gebuertsdag. Den Traditiounsbetrib, deen als kleng Epicerie ugefaangen huet, ass antëscht de véiert gréisste Patron am Land. Wéi huet sech de Groupe mat der Zäit entwéckelt, wéi geet ee mat Konkurrenz ëm a wéi positionéiert ee sech ëmmer nei, an enger Geschäftswelt déi permanent ännert? Ënnert anerem doriwwer hu mir dëse Samschdeg an der Emissioun Background am Gespréich mam Generaldirekter geschwat.

De Projet vum neie Cactus zu Esch-Lalleng wäert wuel net virun 2019 lancéiert ginn, dat sot de Generaldirekter vum Groupe Cactus Laurent Schonckert um Samschdeg an eiser Emissioun Background am Gespréich. De Projet huet wéinst Plainte virum Verwaltungsgeriicht schonn e laange Baart. An Tëschenzäit huet de Cactus d'Pläng adaptéiert. Neierdéngs sollen nieft dem Supermarché och an enger éischter Phas 200 Wunnengen an duerno nach emol Appartementshaiser um Site entstoen. Enn dës Joers sollen d'Resultater vun enger Verkéiersetude virleien. Duerno wëll sech de Cactus-Grupp fir d'Baugenehmegung mat der Gemeng zesummesetzen. Aner Autorisatioune leien den Ament och nach net fir.

Am Dossier vum fréiere Monopolsgebai zu Ettelbréck, bleift de Cactus bei senger Positioun fir net ze verkafen. Virun de Wahlen hate verschidde Parteie jo gefuerdert, d'Gemeng sollt dat aalt Gebai selwer kafen. Wéinst Problemer mat der Statik kann nëmmen de Rez-de-chaussée vum ale Monopol fir Verkafszwecker benotz ginn. En Investisseur mat an ze huelen Boot, géif dem Laurent Schonckert no awer de finanzielle Kader sprengen.

Zu Lëtzebuerg gëtt et den Ament kommerziell Verkafsfläch vun enger Millioun Quadratmeter. An den nächste Jore sollen der, dem Laurent Schonckert no, 250.000 derbäi kommen. Eng Gréisstenuerdnung vu ronn 25 Fussballfelder. De Generaldirekter vum Cactus-Grupp a Vizepresident vun der Handelskonfederatioun warnt an deem Kontext virun engem renge Verdrängungswettbewerb. Dat heescht, datt verschidde Geschäfter sech op Dauer net hale wäerten. Eng Reguléierungskommissioun wéi et se fréier gouf, wënscht sech de Laurent Schonckert nawell net méi zréck. Dat wier net méi zäitgeméiss. De Marché géif sech selwer reguléieren.

Background am Gespréich mam Laurent Schonckert

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen. Op Radio Lëtzebuerg gëtt de Background sonndes owes um 20 Auer rediffuséiert.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.