VIDEO: Background am Gespréich vum 4. NovemberPaul Helminger: Dem Luxair-Grupp geet et gutt

Invité dëse Samschdeg am Background am Gespréich war de Paul Helminger, President vum Verwaltungsrot vu Luxair a Cargolux.

Radio - Background: Paul Helminger (04.11.2017)
Eng Stonn, fir hannert d'Kulissen ze kucken.

Ronn 4 Joerzéngte laang war de Paul Helminger an der Politik doheem, als Staatssekretär, laangjäregen Deputéierten a Stater Buergermeeschter. Viru 5 Joer huet den DP-Mann der Politik de Réck gedréint a sëtzt haut mat un den Hiewele vun den zwou Lëtzebuerger Airlinnen.

Dem Grupp Luxair geet et gutt, well en diversifiéiert an op 4 Pilieren opgebaut ass. Dat sot de President vum Verwaltungsrot, Paul Helminger, e Samschdeg de Mëtteg an der Emissioun Background am Gespréich.

D'Airline selwer hätt keng Iwwerliewenschance, bei verschiddenen Destinatioune géif d'Luxair souguer Sue bäileeën, seet de Paul Helminger. All eventuell Verloschtgeschäfter gi vun "Luxair tours", "Luxair Cargo" a "Luxair Services" opgefaangen.
 
D'Airline hätt awer d'Roll vum Garant fir eng optimal Vernetzung vu Lëtzebuerg an dat wier och wichteg. Et wier séchergestallt, datt de Wirtschafts-, Finanz- an Tourismus-Standuert Lëtzebuerg mat anere wichtegen Destinatiounen an Europa verbonne wier an dat géing nun emol eppes kaschten.

D'Präsenz vun neie Fluchgesellschaften um Findel erhéicht natierlech den Drock op d'Luxair, seet de President vum Verwaltungsrot, notamment bei der Präis-Struktur. Op där aner Säit wier e Fluchhafen, dee floréiert, awer och ganz wichteg an d'Luxair profitéiert jo och beim Handling vun den neien Acteuren.

Bei der Flott kéim een un d'Limitte vun de Capacitéiten. D'Luxair sicht dofir den Ament no engen neien Typ Fliger. Et soll esou en Tëschemodell hier, tëscht der Boeing 737 an dem Bombardier Q400.

D'Luxair tendéiert zu der C-Serie vu Bombardier. Dësen Jet bitt Plaz fir 120 bis 130 Persounen.

Background am Gespréich mam Paul Helminger



Iert de Paul Helminger an der Aviatioun doheem war, war hie joerzéngtelaang politesch aktiv, als Staatssekretär, Deputéierten a Stater Buergermeeschter.

Kuerz no de Gemengewahle seet den DP-Politiker, datt hie mat deene Gréngen ëmmer gutt zesummegeschafft hätt. Datt et elo um Knuedler wuel keng Suite vun där Koalitioun gëtt, géing hie mat enger klenger Tréin gesinn.

Viru 5, respektiv 6 Joer huet de Paul Helminger sech aus der Politik zeréck gezunn. D'Gemengewahlen 2011 waren notamment net grad esou gelaf wéi den deemolege Buergermeeschter Paul Helminger et sech erhofft hat ...

De Paul Helminger iwwert d'Wahlen 2011



De Rendez-Vous fir de Background ass e Samschdeg tëscht 12 an 1 Auer op der Antenn vun RTL Radio Lëtzebuerg, op RTL.lu an op der App.

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen. Op Radio Lëtzebuerg gëtt de Background sonndes owes um 20 Auer rediffuséiert.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.