Background am Gespréich vum 13. JanuarBlo, Rout, Gréng a Schwaarz iwwer Wuesstem a Pensiounen

D'Corinne Cahen, de Claude Haagen, de Christian Kmiotek an de Marc Spautz hu fir eng animéiert Emissioun "Background am Gespréich" gesuergt.

Radio - Background: Wat fir ee Wuesstem wëllen d'Parteien? (13.01.2018)
An der Emissioun "Background am Gespréich" waren d'Corinne Cahen (DP), de Claude Haagen (LSAP), de Christian Kmiotek (Déi Gréng) an de Marc Spautz (CSV).

Nohalteg, qualitativ oder awer intelligent? D'Diskussioun iwwert de Wuesstem zu Lëtzebuerg ass lancéiert an dierft och d'Campagne vun de Chamberwalen dominéieren.

Mir hunn dëse Samschdeg an der Emissioun Background mat 4 Parteipresidente vu Blo, Rout, Gréng a Schwaarz iwwert dëse Sujet geschwat, deen d'Zukunft vum Land jo maassgeeblech beaflosst.

Wéi soll sech Lëtzebuerg an den nächste Joren entwéckelen? Wéi kann, soll de Wuesstem gesteiert ginn? Wéi  eng Aktivitéite solle prioritär gefërdert ginn a wéi kënnen déi negativ Konsequenzen vum Wuesstem, also de Stau an déi héich Wunnengspräisser, geléist ginn?

Alles dat Froen, deene mer mam Corinne Cahen, Claude Haagen, Christian Kmiotek a Marc Spautz nogaang sinn. Si all waren e Samschdeg an der Mëttesstonn fir eng Table ronde iwwert de Lëtzebuerger Wuesstem Invitéeën an der Emissioun Background am Gespréich.

Background am Gespréich mat Cahen, Haagen, Kmiotek a Spautz



WUESSTEM ass näischt Schlechtes soen DP an LSAP. En erlaabt eis, eise Sozialsystem ze finanzéieren an duerfir ze suergen, datt sech d'Betriber hei am Land weider entwéckele kënnen. Wann ee vu Wuesstem schwätzt, dierfe mer net nëmme vu Betriber schwätzen, déi vu baussen erakommen, sou d'DP-Presidentin Corinne Cahen.

Wann een verhënnere wéilt, datt sech jiddereen hei am Land néierléisst, misst een un de gesetzleche Kader goen, huet den LSAP-Parteichef Claude Haagen gemengt.

Mir brauche Wuesstem, seet och d'CSV. Mä e muss méi selektiv sinn, bei all Implantatioun misst d'Fro gestallt ginn, wat se reell dem Land an de Leit bréngt.

An engem Land mat endleche Ressourcë musse mer de Fouss vum Gas huelen, sou de Plädoyer vun deene Gréngen. De Parteipresident Christian Kmiotek huet sech fir eng aner Besteierung beim Ressourcëverbrauch ausgeschwat.

Am Dossier GOOGLE sinn déi Gréng hin an hier gerappt. Dee wier, anescht wéi eng griichesch Jughurtsfabréck oder e Steewollproduzent konform zum Rifkin-Prozess. Besser wier et gewiescht den Internetgigant net op der grénger Wiss, mä op enger aler Industriefriche z'implantéieren.

Där selwechter Meenung war och de Marc Spautz.

D'Thema PENSIOUNEN hunn déi 4 Invitéë ganz animéiert gefouert. DP, LSAP an déi Gréng reprochéieren der CSV, Panik ze maachen. D'Rente si sécher a mir wëlle keng Hauruckdiskussiounen, sot d'Corinne Cahen. An de Christian Kmiotek huet gemengt, d'Rente wiere elo zwar sécher, mä et misst ee virbereet sinn, wann duerch Digitaliséierung ëmmer manner Leit gebraucht ginn. D'Besteierung an d'Verhältnis zu der Aarbecht misst iwwerduecht ginn.

Hei war et och den allgemengen Appell vun de 4 Intervenanten, datt déi DIGITAL ENTWÉCKLUNG mat adequate Formatioune begleet gëtt. De Marc Spautz huet sengersäits betount, d'CSV géif net drun denken, d'Pensiounen ze kierzen an déi aktuell Verspriechen a Fro stellen. D'Oppositiounspartei wéilt just eng Diskussioun iwwert d'Zukunft féieren.

D'DP hirersäits wëll prioritär duerfir suergen, datt d'Aarbechtsplazen do geschaf ginn, wou d'Leit wunnen. Potenzial gesäit d'Corinne Cahen och ëm sougenannten Co-Working, dat heescht flexibele Bureausraim an am Ausbau vum TELETRAVAIL. Den Ament ass e Pilotprojet beim Staat am Gaang. Donieft wier een am Gaang z'analyséieren, wou den Teletravail zu Lëtzebuerg konkret applizéiert ka ginn, sou de Claude Haagen.

Reaktioun vum Frank Kuffer

Wat iwwerdeems eng Ausso vum Parteipresident vun déi Gréng un d'Adress vum CSV-Gemengeconseiller vun Ierpeldeng Frank Kuffer ugeet, huet dësen um Sonndeg den Owend via Mail reagéiert. De Christian Kmiotek hat an der Emissioun Background gesot, Zitat: "den Här Kuffer mécht de Leit Angscht am Dossier Pensiounen" an huet sech dobäi op ee Message bezunn, deen dee Betraffenen op Twitter gesat hat. De Frank Kuffer huet a sengem Mail präziséiert, dass et sech heibäi ëm ee Copy/Paste aus dem DP-Wahlprogramm aus dem Joer 2013 gehandelt huet, andeem et geheescht hat, dass d'Rentereserven an 20 bis 25 Joer opgebraucht sinn, wa sech um gesetzleche Niveau näischt ännert. Den CSV-Politiker huet a sengem perséinlechen Numm reagéiert: et wier éischter eng Kritik um Koalitiounspartner DP, sou nach de Frank Kuffer.

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.