Background am Gespréich vum 10. FebruarWengler: Enquêten no déidlechem Zuchaccident net ofgeschloss

De Generaldirekter vun der Lëtzebuerger Bunn, Marc Wengler, war e Samschdeg an der Emissioun Background am Gespréich.

Radio - Background: De Marc Wengler (10.02.2018)
Eng Stonn, fir hannert d'Kulissen ze kucken.

D'nächst Woch, de 14. Februar gëtt et ee Joer, dass et tëscht Beetebuerg an Diddeleng zu engem déidlechen Zuchaccident komm war. D'Enquêtë sinn nach net ofgeschloss, sot de Generaldirekter vun den CFL Marc Wengler e Samschdeg de Mëtteg an der Emissioun Background am Gespréich. Dat betrëfft souwuel d'Enquête Judicaire, wéi och d'Enquête Technique. Zu dësem Zäitpunkt géifen et keng nei Elementer ginn, zousätzlech zu deem, wat scho gewosst ass. Duerch de Secret d'Instruction dierft hien och net méi soen. De Marc Wengler huet awer drop higewisen, dass d'Ongléck seng Spueren hannerlooss huet. Déi ganz Entreprise wier markéiert doduerch. Wéini d'Enquêten ofgeschloss sinn, wier zu dësem Zäitpunkt schwéier soen, sou nach de Generaldirekter vun den CFL.

Nom Ongléck goufen awer eng sëlleche Konsequenze gezunn a weider Sécherheetsmesurë getraff. Dat geet vun der Formatioun vun de Leit, der Sensibilisatioun, bis hin zum neie Sécherheetssystem ETCS. Zanter 2014 schonn ass de ganze Lëtzebuerger Zuchreseau mat dësem europäesche System equipéiert. Antëscht ass dat och an all de Passagéierzich vun den CFL de Fall. Bis Enn 2019 mussen och all d'Gidderzich mat dësem Sécherheetssystem equipéiert sinn.

D'Retarde vun den Zich waren och e Sujet an der Emissioun Background. De Generaldirekter vun den CFL war formell, déi aktuell Situatioun wier net zefriddestellend. Et misst ee constatéieren, dass zanter 2014 d'Pünktlechkeet progressiv erofgaangen ass. Mat där Entwécklung wier een net zefridden, dat wier eng Préoccupatioun, sou de Marc Wengler. Fir deem entgéint ze wierken, sinn iwwert déi nächst Joren eng sëlleche Projete geplangt, fir de Reseau auszebauen an d'Kapassitéite weider an d'Luucht ze setzen. Bis d'Joer 2023 huet d'Lëtzebuerger Bunn Investissementer an Héicht vu bal 4 Milliarden Euro virgesinn. Ee vun de grousse Projeten ass den Ausbau vun der Stater Gare, vun ënnert anerem 4 op 6 Quaien. Den Investissement chiffréiert sech op ronn 170 Milliounen. Dat ass net vu Muttwëll, wann ee weess, dass all Dag ronn 1.000 Zich an der Stater Gare ukommen an nees fortfueren.

Background am Gespréich mam Marc Wengler


D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.