Background am Gespréich vum 24. FebruarHate speech: Haassrieden am Internet

Dëse Samschdeg hu mir iwwert den "Hate speech" geschwat, do virun allem op de soziale Netzwierker a Foren, ma och op aneren Internetsäiten.

Radio - Background (24.02.2018)
Eng Stonn, fir hannert d'Kulissen ze kucken.
Haassrieden, déi och déi traditionell Medie viséieren. Wéi prekär ass dat Iwwerwanne vun der Hemmschwell? Wat bedeit et fir d’Persounen, déi ugegraff ginn oder fir d’Instanzen? A wéi gesäit et aus mat der Medienerzéiung zu Lëtzebuerg, wéi kréien d‘Kanner an déi Jonk den Ëmgank mat de Medien méi nobruecht? An an där ganzer Diskussioun, wou steet do nach de Journalist?

Mir hunn iwwert dës Aspekter dëse Samschdeg, mam Roger Infalt, dem Vizepresident vun der ALJP, der Lëtzebuerger Associatioun vun de professionelle Journalisten, dem Luc Marteling, Chefredakter vum RTL.lu, an dem Thomas Lenz, Bildungssoziolog vun der UNI.lu geschwat.

Background am Gespréich Spezial "Hatespeech"


D’Medie mussen oppassen, datt si net vun engem klenge Grupp fir hir Cause mëssbraucht kënne ginn. Dëst war ënnert anerem eng vun den Aussoen, e Samschdeg de Mëtteg an der Emissioun Background am Gespréich. Nëmmen ee klenge Grupp vu Leit géif op Haassrieden zeréck gräifen. Dofir dierft een awer net d‘Kommentärsparten zum Beispill op den Internetsite vun de Medie spären. D’Bierger hätten nämlech nach ëmmer e Recht op Meenungsfräiheet. Allerdéngs mussen haut verschidde Leit méi encadréiert gi wéi soss, an et muss een hinnen och bewosst maachen, datt si sech net an engem rechtsfräie Raum beweegen. An Zesummenaarbecht vum Presserot ass dofir och d’Netiquette ausgeschafft ginn: D’Reegelen, déi am Internet solle gëllen. Net nëmme fir ze soen, wat een net duerf maachen, mee och fir de Spillraum vum Medienhaus opzeweisen.

Ee weidere Volet war d’Aarbecht vum Journalist.  Ee Stéchwuert an den Diskussiounen do si Fake News oder Lügenpresse, Reprochen, déi d’Medien ze héiere kréien. E Mësstraue vis-à-vis vun der Presse géif hien net spieren, sot de Vizepresident vun der Lëtzebuerger Associatioun vun de professionelle Journalisten, de Roger Infalt. Hie géif virun allem eng Demande vun de Leit spieren, déi gäre Sujete méi an der Déift hätten. Ma d‘Journalisten hätten sech zu Lëtzebuerg an de leschte Joren ze vill, Zitat, „benotzen" gelooss.  Et wier eng Zort Terminjournalismus zustane komm, deem ee misst entkommen. Allerdéngs huet de Journalist hei zu Lëtzebuerg d’Liberté d’accès à l’information net, kritiséiert de Roger Infalt. Aner Invitéeën an der Emissioun waren de Chefredakter vum RTL.lu, de Luc Marteling, an de Bildungssoziolog op der Uni.lu, den Thomas Lenz.

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.





Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.