Background am Gespréich vum 14. AbrëllAsselborn: Mat oder ouni Gëftgas, et ass Katastrophe a Syrien

Den Ausseminister war um Samschdeg an der Emissioun Background am Gespréich.

Radio - Background am Gespréich: Jean Asselborn (14.04.2018)
Eng Stonn, fir hannert d'Kulissen ze kucken.

Mat oder ouni Gëftgas, et ass eng Katastrophe a Syrien, dat sot  an enger éischter Reaktioun de Lëtzebuerger Ausseminister Jean Asselborn.

De Lëtzebuerger Diplomatiechef war um Samschdeg an der Mëttesstonn eisen Invité an der Emissioun Background am Gespréich.

D'Loftattacken an der Nuecht wieren eng präzis Aktioun gewiescht. Eng Aktioun, déi awer u sech den Accord vum UNO-Sécherheetsrot brauch, wéi et an der Charta vun de Vereenten Natiounen fir all militäresch Attack virgeschriwwen ass. Duerfir sot de Jean Asselborn am Background, et misst ee sech bewosst maachen, dass et den Ament rechtlech op internationaler Bühn schwiereg ass. Et wär awer kloer, dass een net kéint einfach d'Aen zoumaachen, wann Gëftgas am Spill ass.

De Lëtzebuerger Chefdiplomat fënnt et awer schued, dass de Rapport vun der Organisatioun fir de Verbuet vu chemesche Waffen OPCW net ofgewaart gouf. Den Emmanuel Macron, d'Theresa May an den Donald Trump si jo dovunner iwwerzeegt, dass Gëftgas zum Asaz koum. D'Russe soen, et wär näischt bewisen an den Jean Asselborn fënnt et e wéineg komesch, dass de russeschen Ausseminister Lawrow behaapt, de briteschen Geheimdéngscht géif hannert der Attack stiechen.

D'Welt géif scho méi laang net méi optimal funktionéieren, huet de Jean Asselborn gemengt. Wat et och nach ni ginn hätt, wier en US-President, dee via Twitter "smart Missilen" annoncéiert. An dësem Fall wieren d'Arméien dacks méi rational wéi verschidde Politiker.

Fir de Lëtzebuerger Ausseminister ass et selbstverständlech, datt et dat elo mat  dësen Attacken gewiescht muss sinn. Elo misst ee lo nees op eng ganz aner Schinn kommen. Also verhandelen, zu Genf an am UNO-Sécherheetsrot eng Positioun ze declinéieren déi vun de 5 Veto-Mächt gedeelt ka ginn.

Syrien wier manifestement e Krich, wou ee ganz séier eng Léisung kéint fannen. Den Ament géife mer awer just riskéieren, ëmmer méi Kricher am Krich ze kréien. Do wou de Jean Asselborn sech sécher ass, de Baschar Al-Assad kann net d'Zukunft vu Syrien sinn. Dat missten och d'Russe wëssen, sou den Ausseminister am éischten Deel vun der Emissioun Background.


Background am Gespréich: Jean Asselborn



De Jean Asselborn am Background (14.04.2018)
Den Ausseminister war um Samschdeg an der Emissioun Background am Gespréich.

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.