Background am Gespréich vum 7. JuliD'Walen 2018 aus der Siicht vu KPL, Piraten an déi Konservativ

Invitéeën dëse Samschdeg an der Emissioun Background am Gespréich waren de Sven Clement (Piraten), den Ali Ruckert (KPL) an de Joé Thein (déi Konservativ).

Resumé Background: Logement a Wuesstem am Fokus (07.07.2018)
Invitéen waren d’Presidenten vun den Parteien KPL, de Piraten an déi Konservativ. Virun allem gouf den Bau vun mei Wunnengen hei am Land gefuerdert.

Eppes méi wéi 3 Méint virun de Chamberwale waren dëse Samschden d'Presidente vun der Piratepartei, vun der Kommunistescher Partei a vun déi Konservativ Invité am Studio.

Background am Gespréich mat Thein, Ruckert a Clement


Mam Sven Clement, mam Ali Ruckert a mam Joé Thein hu mer iwwer hir Prioritéite fir dës Walen, iwwert d'Sujete Logement a Wuesstem an iwwert d'Schwieregkeete fir kleng Parteien, Kandidate fir op d'Lëschten ze fannen, diskutéiert.

Thema: Logement

De Sven Clement sot, dass, wat d’Problematik vum Logement ugeet, net genuch géif gebaut ginn. Op der enger Säit wéilt ee gären eng national Wunnengsbaupolitik duerchféieren, op der anerer Säit kéinten d'Gemengen awer duerch hir Autonomie maache wat en se wëllen. D'Piraten sinn dofir, fir mat de Gemengen zesummen, also iwwert de Syvicol ze schaffen a sou e nationale Projet op de Plang ze bréngen. D'Pirate sinn dann och fir eng Quote déi festleet, wéi vill Wunnraum minimal misst geschafe ginn. Et wär een och fir Mixitéit an de Quartieren, an dass en 3. ëffentleche Promoteur sollt geschafe ginn.

De Sven Clement vun de Piraten

Den Ali Ruckert huet betount, dass Stat a Gemenge beim Wunnen hir Verantwortung z’iwwerhuelen hätten. Der KPL wiert et dogéint och wichteg, dass Baugesellschaften geschafe ginn, well et net genuch Bauaarbechter zu Lëtzebuerg géif ginn. Et kënnen am Moment ronn 3500-3700 Wunnenge gebaut ginn an da wier Schluss. Hei misst vill méi dran investéiert ginn, d'KPL fuerdert ronn 50.000 Wunnengen déi kënne gelount ginn. Séier misst et goen, Gemengen a Staat missten sech ganz kloer dran investéieren, Spekulatiounen sollen esou en plus evitéiert ginn. D’KPL ass och dowéinst fir eng Spekulatiounssteier op Haiser an Terrainen, déi brooch leien.

Den Ali Ruckert vun der KPL

Fir de Joé Thein sollt d’Grondsteier fir sozial schwaach Familljen ofgeschaaft ginn. Dobäi kënnt, dass ee fuerdert, dass staatlech Miet- a Sozialwunnenge gebaut ginn, dat mat soziale Präisgrondlagen. Et wënscht een sech e pro-aktive Staat, also de Staat als ëffentleche Promoteur. De soziale Wunnengsbau misst an ëffentlecher Hand sinn, genee sou wéi Gas, Elektresch oder Waasser. Méi ëffentleche Wunnraum wier wichteg: 6000 Wunnenge pro Joer a 600 Wunnenge fir Sans-abrien ass eng weider Fuerderung vun déi Konservativ. Schätzungen no géife grosso modo 30.000 Sozialwunnengen zu Lëtzebuerg feelen.

De Joe Thein vun "déi Konservativ"



Thema: Wuesstem

De Sven Clement sot dozou, dass d’Land eng intelligent Croissance bräicht. Et misst sech dorun orientéiert ginn, wat d’Besoine vun de Leit sinn, déi Aarbecht sichen.

De Sven Clement vun de Piraten

Dem Ali Ruckert no géif gesot ginn: “Mir hätte gär, dass d’Betriber dohi kommen, wou d’Leit wunnen!”.

Den Ali Ruckert vun der KPL

An den Ae vum Joé Thein misst virun allem de Populatiounswuesstem gebremst ginn: Seng Partei wéilt nämlech keng Iwwerpopulatioun. Donieft dierft een en anere Sujet net aus den Ae verléieren.

De Joe Thein vun "déi Konservativ"




D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.