Background am Gespréich vum 14. JuliBettel a Wiseler mat hëtzeger Debatt iwwer ë.a. Steieren a Logement

Invitéen dëse Samschdeg an der Emissioun Background am Gespréich waren de Staatsminister Xavier Bettel an den CSV-Fraktiounschef Claude Wiseler.

Background am Gespréich mam Xavier Bettel a Claude Wiseler (14.07.2018)
Eng Stonn, fir hannert d'Kulissen ze kucken.

D’Wale sti virun der Dier, d’Parteie positionéiere sech. D’Leit si virun de Choix gestallt. Dëse Samschdeg stounge sech géintiwwer de Staatsminister Xavier Bettel an den CSV-Fraktiounschef Claude Wiseler.

De Staatsminister Bettel ass zefridde mam Bilan vu senger Regierung a sou wéi d'Land déi lescht Jore positionéiert gouf.

Säin Challenger, den CSV-Spëtzekandidat Claude Wiseler, gesäit dat anescht an trëtt un, fir am Oktober neie Staatsminister ze ginn. Sech laangfristeg engagéiere an iwwer Generatioune plangen an nodenken, dat géing d'CSV haaptsächlech vun der aktueller Regierung ënnerscheeden, dat sot de Claude Wiseler de Samschdeg de Mëtteg an eiser Emissioun Background am Gespréich.

Background am Gespréich mam Xavier Bettel a Claude Wiseler

Background: Face-à-face X. Bettel - Cl. Wiseler (Resumé) (14.07.2018)
Et goung ëm Wuesstem, Verkéier, Logement a Steierpolitik.


Thema Wuesstem
Et hätt een d'Fro vum Wuesstem anescht ugepaakt. Den Ament wär d'Devise einfach "Wuesstem fir Wuesstem". Lëtzebuerg misst wuessen, "jo", a bräicht dat och, mä et misst een deen anescht leeden a begleeden, sou de Claude Wiseler.

Wann een den demographesche Wuesstem einfach esou lafe léisst, da muss een och op d'Fro äntweren, wéi een deen accompagnéiert. Wei reegelt een den Trafic, deen d'Land erstéckt, wou kommen d'Schoulen a Wunnengen hir a wéi suergt ee fir d'sozial Kohäsioun.

D'Leit wären awer nach ni esou zefridde gewiescht wéi haut, huet de Xavier Bettel geäntwert. De Wuesstem wär wichteg fir de Grand-Duché. Et géing een haut besser haut do stoen, wéi viru 5 Joer. A punkto Wuesstem hätt een de Problem vum Trafic schliisslech geierft. An de Jean-Claude Juncker hätt scho viru Jore vum 700.000 Awunner-Staat geschwat a wann een dat deemools scho komme gesinn huet, dann hätten d'Politiker och d'Konsequenze missten entaméieren, sou de Lëtzebuerger Premier.

Nachholbedarf am Secteur Verkéier géif et gi jo, mee et hätt een de Retard am ëffentlechen Transport opgeholl an et géing ee konsequent dru viruschaffen.

Thema Steieren
Hëtzeg diskutéiert gouf awer och iwwer d'Steierreform an d'Fro, wéi d'Steierklassen anescht kënnen adaptéiert ginn. Fir de Premier soll d'Individualiséierung d'Reegel ginn. Wéi eng DP dat ëmsetze wëll, ass awer nach net kloer. Dat ass den CSV-Spëtzekandidat och net midd ginn, ëmmer nees ze kritiséieren. Fir déi Chrëschtlech-Sozial soll d'Steierklass 1a reforméiert, ma net definitiv ofgeschaaft ginn.

Thema Logement
Kontrovers gouf wärend der Emissioun "Background am Gespréich" och iwwer Bauen a Wunnen debattéiert.

Keng Lektioune wollt sech den CSV-Spëtzekandidat an der Logementspolitik erdeelen loossen. Piste fir de Claude Wiseler sinn d'Erweidere vun de PAGen, wougéint sech d'CSV bis ewell gestrieft huet, grad wéi eng national Tax op bebaubar Terrainen, déi awer als Spekulatiounsobjet zréckbehalen ginn. Och ass d'CSV derfir, datt de Pacte Logement misst reforméiert an nei verhandelt ginn.

Fir de Staatsminister Bettel ass de Wee an d'Locatioun eng vun de wichtege Pisten, déi d'Regierung och géif ënnerstëtzen. D'Präisser kéint een net briechen, wann d'Offer der Demande net géif entspriechen: Den "oubliés du Logement" - deene jonke Famillen - misst absënns gehollef ginn, sou de Xavier Bettel.

D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.