RTL-Wal-Tournée 2018Um Bottermaart zu Dikrech goung et ëm den Norden

Dëse Samschdeg war d’RTL-Team vun 10 bis 13 Auer zu Dikrech um "Bottermaart" (Place Joseph Bech). Dat Ganzt elo am Replay op RTL.lu.

22/09/2018 Background Spezial Walen: NORDEN



Um Programm: Table ronde, Diskussiounen, Animatioun, Musek, gutt Stëmmung an en RTL-Gewënnpill.

RTL-Wal-Tournée mam Background Spezial Walen "Norden" (22.09.2018)
Eng Stonn, fir hannert d'Kulissen ze kucken.

Wéi gesinn déi verschidde Parteien den Norde vum Land, a wéi eng Richtung soll d'Éislek sech entwéckelen, gëtt d'Nordstad iwwerhaapt richteg gelieft, ass deen Deel vum Land der Politik hiert Stéifkand? Op der 2. regionaler Table Ronde vu Radio Lëtzebuerg hu 6 Kandidaten d'Iddie vun hirer Partei erkläert an op verschiddene Punkten och kontrovers diskutéiert.

Eng Table Ronde ass, par définition eng éischter on-sexy Diskussiounsronn, well een als Politiker a ganz kuerzer Zäit esouvill Argumenter wéi méiglech muss placéiert kréien. Zu Dikrech goung et awer eleng ëm d'Nordstad, an deen een oder aneren huet nawell intressant Iddien zum Beschte ginn, wat ee bräicht a wat een net méi wëllt, an eisem Éislek. D'Karin Meyer vun déi Lénk weist zum Beispill mam Fanger op Awunner, déi iwwerhaapt keng sinn. Et hätt een op Plaze mat Bréifkëschte-Firmaen ze dinn, wou da guer keng Leit an de Wunnenge géinge Wunnen, esou d'Karin Meyer.

Och am Norde vum Land hätt een am Logement e Retard vun 30 Joer opzeschaffen, kritiséiert de Marc Hansen. Hie wier hei uewen doheem, et géif investéiert, an d'Gemenge kéint een nach méi ënnerstëtzen. Locatif Social ass dem bloe Minister säi Schlëssel an hie wéisst, dass och hei eng national Taxe op Bauland eleng näischt géif bréngen, och Expropriatiounen net. Fir d'éischt misst een emol all déi aner Méiglechkeete benotzen, déi een huet, ier ee géing vun Expropriatioun géing schwätzen, sou de Marc Hansen.

Wouropshin déi aner eng Expropriatioun op eemol och just als ultimativ Léisung am intérêt public wëlle gesinn.

Am Éislek wunnen heescht awer fir d'éischt emol heem fueren. Déi eng kritiséieren d'Onzouverlässegkeet vum Zuch, déi aner soen de Contraire. De Claude Turmes, frësch gebaakene grénge Nordkandidat, setzt donieft op Express-Bussen, den Ausbau vun der Gare zu Ettelbréck a kritt eng Äntwert vum Martine Hansen vun der CSV. Dem Martine Hansen no muss souwuel an de Bus, den Zuch wéi och an d'Stroossen investéiert ginn. Si huet dann och nach eng Kéier ervirgehuewen, datt den Ausbau vun der Gare zu Ettelbréck lancéiert ginn ass vum Marco Schank a vum Claude Wiseler an dat elo nëmmen huet misse virugefouert ginn.

Mam Auto ass alles méi einfach gëtt de Jeff Engelen, adr, zou, a reegt sech op, dass et mat där N7 fir ze baschte net viru geet. De Romain Schneider huet dogéint gehalen a gemengt, datt op enger Informatiounsversammlung am Norden de François Bausch e Konzept virgestallt hätt an dëst vu bal alleguer de leit ugeholl gi wär.

Jo, richteg héieren, als Sozialist hält de Romain Schneider deene Gréngen d'Partie, verdeedegt an erkläert hir Method. Ass den Norden d'Stéifkand vun der Politik? Op kee Fall!

Resumé vun der RTL-Wal-Tournée am Norden/Rep. Monique Kater



RTL-Wal-Tournée 2018 am Norden (22.09.2018)
Dëse Samschdeg war d’RTL-Team vun 10 bis 13 Auer zu Dikrech um "Bottermaart" (Place Joseph Bech). Live op Radio Lëtzebuerg, op der Télé an op RTL.lu.


De Programm zu Dikrech
10-12 Auer: RTL Weekend - Live um Terrain mam Christiane Kremer a Mike Fandel

Kultur, Sport, Lifestyle an Invitéen: Déi labber Talk-Ronn vum Weekend huet sech dëse Samschdeg um Terrain getraff an iwwer déi verschiddenst Themen diskutéiert. Gutt Stëmmung a vill Freed war duerch d'RTL-Gewënnspill mat flotte Präisser, wéi eng Apple Watch oder en RTL-Bluetooth-Speaker garantéiert.

Virun der grousser politescher Table ronde konnt ee wärend 2 Stonnen Dikrech besser kenne léieren. Mir goufe gewuer, wat et mam Iesel op sech huet a mam Béier, wéi de Kuddelfleck hei zerwéiert gëtt oder datt den éischte Stärerestaurant hei am Land zu Dikrech war. Ausserdeem gouf iwwer Autoen am Musée, iwwer Al-Dikrech, iwwer den neie Kino Scala an de Film vun der Woch "Blackkklansman" geschwat.

© Ketty a Rom Hankes


12-13 Auer: Background am Gespréich, Spezial "Walen 2018" mam Carine Lemmer a Nadine Gautier

Dëse Samschdeg hunn d'Carine Lemmer an d'Nadine Gautier aus der RTL-Radio-Redaktioun de Spëtzekandidaten aus dem Norden op den Zant gefillt, hunn am offenen Debat iwwert déi verschidde Punkten aus de Partei-Programmer diskutéiert a fir eng animéiert politesch Ronn gesuergt.

22/09/2018 Background Spezial Walen: NORDEN



D’Invitéë vun dëser Table ronde waren: Jeff Engelen (ADR), Marc Hansen (DP), Martine Hansen (CSV), Karin Meyer (déi Lénk), Romain Schneider (LSAP) a Claude Turmes (déi gréng).



Déi nächst Rendez-vouse vun der RTL-Wal-Tournée 2018

29. September | Zentrum, "Knuedler" (Place Guillaume), Stad Lëtzebuerg

6. Oktober | Süden, "Am Duerf", Diddeleng

Um Walsonndeg, de 14. Oktober si mir op RTL Télé Lëtzebuerg, RTL Radio Lëtzebuerg an RTL.lu de ganzen Dag fir Iech um Dill an halen Iech iwwer all wichteg Evolutioun am Land um Lafenden.

Dir wëllt matdiskutéieren? Dann notzt op Facebook an op Twitter eisen #RTLwalen18


D'RTL Wal-Tournée am Replay
De 15. September ware mer op der Maartplaz zu Iechternach. Do hu matdiskutéiert: Carole Dieschbourg (déi gréng), Lex Delles (DP), Adela Fuentes (déi Lénk), Françoise Hetto-Gaasch (CSV), Roby Mehlen (ADR) an Nicolas Schmit (LSAP).

RTL.lu: D'Wal-Tournée am Osten.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.