Background am Gespréich vum 20. OktoberFelix Braz: Regierungsbedeelegung ass kee Wonschconcert

Invité dëse Samschdeg an der Emissioun Background am Gespréich war de Felix Braz vun déi Gréng.

Radio - Background: Felix Braz (20.10.2018)
Eng Stonn, fir hannert d'Kulissen ze kucken.

D'annoncéiert Dräier-Koalitioun geet d'nächst Woch mat hire Verhandlungsdelegatiounen an d'Gespréicher, fir en Accord ze finaliséieren. Et soll en Accord sinn, dee kloer eng gréng Handschrëft dréit,dat sot de Verhandlungsleader vun déi Gréng de Felix Braz an der RTL-Emissioun Background am Gespréich um Samschdeg.

Background am Gespréich mam Felix Braz

Zu de gréngen Positiounen, déi wäerte verdeedegt ginn, gehéiert eng ökologesch Steierreform, déi méiglech Legaliséierung vum Cannabis, eng Debatt iwwert d'progressiivt Ofschafe vun de Stock-Options, d'Ëmsetze vu Pisten aus der Etüd iwwert den Tanktourissem an eng Offensive am Logement, wëll dës héich Präisser vill Leit géifen an d'Aarmut dreiwen.

Wien ökologesch Steierreform seet, denkt natierlech och un d'Betribsbesteierung,op en Erofsetzen op 20% wéilten déi Gréng net goen, och bei der Kierperschaftssteier ginn d'Vue tëscht Blo, Rout a Gréng auserneen.

Extrait Felix Braz: Steieren

Déi Gréng stinn och weider fir d'Iwwerschaffe vum Wahlsystem, ewech vum regionale Proporz, woubäi et och net géif duergoen, fir nëmmen ee Walbezierk ze schafen.

Extrait Felix Braz: Walbezierk

De Felix Braz seet zu dësem Ament näischt iwwert d'Besetze vu Regierungsposten, respektiv och net, wéi eng Ministèren déi Gréng fir sech kéinte beusprochen.

Natierlech kann et sinn, datt fir déi Gréng eng weider Fra an d'Regierung kéint kommen, esou de Felix Braz, dee op   Paritéit an der Grénger Fraktioun an enger Paritéit an der Regierung hofft. Mä dëst ass natierlech fir den Ament reng Spekulatiounen, well d'Verhandlungen dierfte sech iwwert de ganze Mount November zéien.

Extrait Felix Braz: Linnen

Allemol wier d'Besetze vu Regierungsposten, sou de Felix Brax, deem et perséinlech gutt gefall huet, déi lescht Joren, fir am Justizministère kënnen Akzenter ze setzen. Op d'Fro, ob d'Rumeure géinge stëmmen, dass de Felix Braz wéilt Ausseminister ginn, äntwert de grénge Politiker, dass ee sech net sollt a senger Plaz de Kapp zerbriechen.

Eng personell Fro gouf dann awer manner evasiv beäntwert: de Felix Braz gesäit kee Grond, fir net un der Kandidatur vum Claude Turmes, fir de Posten vum Lëtzebuerger EU-Kommissär, festzehalen. Wie vun de zwee Kox-Bridder, Martin oder Henri, wäert an d'Chamber goen, géife si selwer ënnert sech decidéieren a sécher zu engem Accord kommen, sou den aktuelle Justizminister. Béid wiere jo un de Rei, sollte sech LSAP, DP an déi Gréng eenegen, fir an d'Chamber nozeréckelen.

Felix Braz am Background (20.10.2018)
Iwwert déi méiglech Koalitioun an de Stand vun "déi Gréng" gouf e Samschdeg um Radio diskutéiert.

Wéini dass de Referendum iwwert déi nei, komplett iwwerschafft, Verfassung soll ofgehalen ginn, misst zesumme mat der Chamber decidéiert ginn. Dës constituéiert sech jo den 30. Oktober. Fir de Felix Braz bréicht dës Verfassungsrevisioun eng grouss a breet Legitimatioun.

Déi Gréng solle sech dann och net an engem inhaltlechen Eck verschanzen. "Mir wëlle fir jiddereen an der Gesellschaft wielbar sinn". Dat sot de Felix Braz op d'Fro, ob déi Gréng dann och elo eng Vollekspartei wären.

Eng aner Vollekspartei weist sech dann nach ganz kämpferesch. D'CSV wier bereet, wann aus Blo-Rout-Gréng näischt géif ginn. Déi Hoffnung gesäit de Felix Braz awer am Moment net, hie wéilt sech awer och vu baussen net an d'Interna vun der CSV amëschen. Just de Claude Wiseler deet dem grénge Politiker leet, deen elo eng Roll spille muss, déi hien net wëll an him net gutt zu Gesiicht steet.

Extrait Felix Braz: Gréng Vollekspartei



D'Emissioun "Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.