Background am Gespréich vum 19. JanuarClaude Turmes: Keen Dieselverbuet, Accisen um Sprit ginn nächst 2 Joer erop

Eng Woch virum Autosfestival, hu mir dëse Samschdeg mam Energieminister Claude Turmes iwwert d’Elektromobilitéit an den Diesel geschwat.

Radio - Background: Claude Turmes (19.01.2019)
Eng Stonn, fir hannert d'Kulissen ze kucken.

D'Accisen um Sprit wäerten dëst Joer ëm 1, 2 oder 3 Cent de Liter an d'Luucht goen - an dat nodeems de Budget gestëmmt gouf - dat huet de gréngen Energieminister Claude Turmes e Samschdeg de Mëtteg an der Emissioun Background confirméiert. Och d'nächst Joer soll dann nach emol eng Hausse vun 1, 2 oder 3 Cent kommen ier da misst gekuckt ginn, wéi et weider goe soll.

Donieft huet de Claude Turmes betount, datt keen Dieselverbuet op Lëtzebuerg kéim, aus dem einfachen Grond, datt d'Stad Lëtzebuerg net a sou enger extremer Situatioun wier wéi zum Beispill grouss Stied an Däitschland.

Wat d'Pendlerpauschal ugeet, wëllt een dës an Zukunft méi sozial gerecht maachen. Dës soll awer och un den ëffentlechen Transport gebonne ginn. Hei misst een da kucken, wéi een dat bei Leit kompenséiert, déi zum Beispill net gutt ugebonne sinn. Hei misst een dem Claude Turmes no awer oppassen, datt ee kee Bürokratiemonster géing entwéckelen.

Background am Gespréich: Claude Turmes



Nach ass den Energieminister vague op der Primm fir Elektroautoen bliwwen. De Claude Turmes huet an der Emissioun Background am Gespréich just betount, datt d’Primm eng Gréisstenuerdnung vun 5.000 Euro wäert hunn. De Moment wier een am gaangen ze préiwen, ob se réckwierkend op den éischte Januar vun dësem Joer kéint ausbezuelt ginn. Op jidde Fall sollten d’Cliente vum Autosfestival déi nächsten Deeg iwwert d’Primm informéiert ginn. D’Elektroautoen si net ganz onëmstridden, wéinst der Produktioun an dem Recyclage vun den Substanzen wéi Lithium a Cobalt. Ma hei wéilt een op europäeschem Niveau Richtlinne ginn.

Donieft géife Firmen, déi gréng Batterien bauen, finanziell mat Fuerschungsgelder ënnerstëtzt ginn. An et géif schonn un der nächster Generatioun vu Batterie geschafft ginn.

Autoen, déi mat Waasserstoff fueren, ass de Moment keng wierklech Alternative, esou de Minister. Fir dee nämlech ze produzéieren, bräicht een eng enorm Quantitéit u Stroum. Mee Waasserstoff hätt eng Zukunft: an zwar an der Industrie a wann d’Technike sech bis verbessert hunn.


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.