Background am Gespréich vum 9. Februar - Steve HeiligerWéi ass den Image vun der Fonction publique zu Lëtzebuerg?

Mam Generalsekretär vun der CGFP hu mer e Samschdeg iwwert d'Fonction publique geschwat, wou se am Moment drun ass a wou de Wee an Zukunft higeet.

Background am Gespréich mam Steve Heiliger (09.02.2019)
Eng Stonn, fir hannert d'Kulissen ze kucken.

De Protestpiquet, Enn November, virum Sëtz vun der Spuerkeess an der Stad hat säin Effet: Dat sot de Steve Heiliger um Samschdeg de Mëtten an der Emissioun Background am Gespréich, wéi hien op de Konflikt ëm Promotioune bei der Bank agoung, deen e Mëttwoch aus der Welt geschafe gouf.

No där Manifestatioun wär eng Drénglechkeetssëtzung mat de Ministere Pierre Gramegna a Marc Hansen gefrot ginn, sou de Generalsekretär vun der Staatsbeamtegewerkschaft CGFP. D’Reunioun e Mëttwoch wär kuerz no 14 Auer lassgaangen, an um 17.45 Auer hätt ee schonn e Kompromëss gehat.

Iwwert d’Ausso, e Mëttwoch, vun der CSV-Deputéiert Diane Adehm, d’Ofschafe vun der 80/80/90-Regelung wär e Walkado gewiescht, kéint hien nëmmen de Kapp rëselen, huet de Steve Heiliger gemengt. Virun de Chamberwalen hätten déi Chrëschtlech-Sozial gesot, si géifen zu deem Accord fir d’Fonction publique stoen. Hien hätt sech dann e bësse méi Koherenz erwaart. D’Wale wären eriwwer, an et sollt een eng Politik fir an net géint déi Jonk maachen.

Wat d’Zesummenaarbecht mam viregte Minister vun der Fonction publique Dan Kersch ugeet, hätt een als CGFP e positive Bilan gezunn. Eng 1. Reunioun mat deem sengem Nofolger Marc Hansen wär iwwerdeems ganz konstruktiv gewiescht.

Ass den ABBL-President Guy Hoffmann der Meenung, dass d’Ufankspai vun engem Redakter beim Stat mat 2.500 € ze héich ass, huet de Generalsekretär vun der Staatsbeamtegewerkschaft nach gefrot; wa sou e Jonken an de Guichet vun enger Bank kéim, fir e Prêt fir eng Wunneng ze maachen, da géifen net vill Meter carréen erauskommen. Et géif eng Interdépendance tëscht dem privaten an dem ëffentleche Secteur ginn, an et wéilt een déi zwee dann och net géinteneen ausspillen, huet de Steve Heiliger betount.

Background am Gespréich mam Steve Heiliger



"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.