Background am Gespréich vum 16. Februar - Leo WagenerZukünfteg Kierch: méi kleng, méi dynamesch a mat grousser Diversitéit

Wéi erlieft d'kathoulesch Kierch d'Trennung vu Kierch a Staat? Doriwwer hu mir dëse Samschdeg an der Mëttesstonn op RTL mam Generalvikar geschwat.

Background am Gespréich: Generalvikar Leo Wagener (16.02.2019)
Eng Stonn, fir hannert d'Kulissen ze kucken.
Wéi geet et der kathoulescher Kierch am Grand-Duché elo ee Joer no der Trennung vu Kierch a Staat? Virop dorëms goung et an der Emissioun Background am Gespréich mam Generalvikar Leo Wagener. D'Kierchefongen hunn d'Kierchefabricken ersat a sinn zanter dem 1. Mee aktiv. Et wier vill Aarbecht, et bleiwen nach Froen op, ma lokal géife ronn 900 Benevolle gutt an de Gremien dorunner schaffen.

Och am Sträit mam Syfel, dem Syndikat vun de Kierchefabricken, wier et méi roueg ginn. Finanziell kéint de Fong awer an Zukunft keng 500 Kierche méi packen, et misst een drun denken, verschidde Kierchen opzeginn. Vill Kierche géife scho quasi eidel stoen, Zuel vun de Gleewegen a vun de Kierchegänger géif generell zréckgoen.

Dat wier awer eng generell Tendenz a Westeuropa. D’Leit hätten haut genuch aner Méiglechkeeten, fir sech reliéis ze beschäftegen a géifen net méi d’Plus-Value vu enger Kierch gesinn. Domadder misst een awer liewen, betount de Leo Wagener. Och d’Zuele vun de Kommunioune wieren réckleefeg. Fir eben déi kathoulesch Kierch an Zukunft nach besser ze promouvéieren, misst verstäerkt mat Hëllef vun deenen digitale Medien kommunizéiert ginn.

Een anere Sujet war de sexuelle Mëssbrauch an der kathoulescher Kierch. Dofir geet den Äerzbëschof d'nächst Woch op d'international Bëschofskonferenz an de Vatikan. Dem Bëschof seng Positioun wier kloer "null Toleranz". Jiddefalls géif d'Kierch am Grand-Duché Präventiounsaarbecht leeschten, virun der Wei misst all Priister oder Diakon ee psychiatreschen Test maachen.

Background am Gespréich mam Leo Wagener


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.