Invité vun der Redaktioun (11. Oktober)Henri Kox: Gemengewahle Réimech kréie juristescht Nospill

E Mëttwoch de Moien um 10 op 8 war den Henri Kox eisen Invité vun der Redaktioun.

Invité vun der Redaktioun: Henri Kox (11.10.2017)
Den Invité vun der Redaktioun vu méindes bis donneschdes moies géint 8h10 am Studio vun RTL Radio Lëtzebuerg.

D'Gemengewahlen zu Réimech kréien effektiv e juristescht Nospill. Dat huet de Buergermeeschter-sortant Henri Kox e Mëttwoch de Moien am RTL-Interview confirméiert. Déi Gréng zu Réimech hunn e Sonndeg bekanntlech zwee Sëtz, a méi wéi 13 Punkte verluer. Réimech gëtt an Zukunft vum liberale Buergermeeschter Jacques Sitz un der Spëtzt vun engem blo-schwaarze Schäfferot regéiert.

Den Henri Kox sot, hie géif d'Wahlen als gewielten Demokrat natierlech acceptéieren an hätt sengem Successeur och en Dënschdeg den Owend gratuléiert. D'Form, wéi dat Ganzt gelaf ass, wëll de grénge Politiker awer net op sech sëtze loossen an huet säin Affekot domadder chargéiert. Nodeems verschidde Saache vun senger Integritéit a Reputatioun a Fro gestallt goufen duerch e Blietchen, wat an all Haushalt verdeelt gouf, sou den Henri Kox. Hie géif elo op d'Justiz vertrauen, datt si dat Ganzt analyséiert.

Den Henri Kox



Den Tirang zu Réimech wier méi wéi gefëllt, fir Projeten ëmzesetzen an den Henri Kox hofft dowéinst och, datt dat gemaach gëtt. Déi Gréng hätte gutt mat der CSV am Schäfferot geschafft an hätten och gär nach weider gemaach. Et wier een elo awer gutt opgestallt fir an d'Oppositioun.

Den Henri Kox hat 2015 déi grouss Éier, fir den éischte grénge Budgetsrapporter ze sinn. Der Rapportrice vun dësem Joer, Joëlle Elvinger, huet hien e Mëttwoch de Moien als eisen Invité vun der Redaktioun mat op de Wee ginn, vill nozelauschteren. Hien hätt all Zäit a ganz ville Reuniounen deemools vill geléiert, och vill iwwert de Funktionnement vum Staat. Dem Henri Kox säi Rapport war "mieux vaut prévenir que guérir" iwwerschriwwen.

Datt d’Regierung déi Logik haut manner géif anhalen, wéi nach virun e puer Joer, wollt den Henri Kox esou net soen. Dem gréngen Deputéierten no, huet Lëtzebuerg nach ëmmer en Appel fir den Duuscht, sollt déi nächst Kris kommen. D'Staatsfinanze misste serieux geréiert ginn, ma d'Land bräicht besonnesch awer och Investissementer, well et nach ëmmer Defiziter gëtt.  Ënnert anerem an der Mobilitéit oder och dem Waasserschutz.

Dës Regierung hätt eng ganz Rei wichteg Weiche gestallt, sou de gréngen Deputéierten ënnert anerem fir d'Land manner ofhängeg vun der Finanzplaz ze maachen. Der  Budgetsrapportrice Joëlle Elvinger huet de Budgetsrapporter vun 2015 mat op de Wee ginn vill nozelauschteren.

Rendez-vous fir den Interview mam Invité vun der Redaktioun all Dag vu méindes bis donneschdes um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

 

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.