Invité vun der Redaktioun (9. Abrëll)René Pizzaferri iwwert dat neit Spidolsgesetz

Invité vun der Redaktioun e Méindeg de Moie war de René Pizzaferri, de President vun der Patientevertriedung.

Invité vun der Redaktioun: René Pizzaferri (09.04.2018)
Invité vun der Redaktioun e Méindeg de Moie war de René Pizzaferri, de President vun der Patientevertriedung.

D'Patientevertriedung kritiséiert, datt d'Dokteren duerch dat neit Spidolsgesetz, dat zanter dem 1. Abrëll a Kraaft ass, méi Matsproocherecht kruten.

De President vun der Patientevertriedung, René Pizzaferri, sot um Méindeg de Mueren am RTL-Interview, datt d'Dokteren nämlech en duebelen Intressi hunn: dee vum Patient awer virun allem och hiren eegenen, well si jo net un d'Spidol gebonne a fräischaffend Mataarbechter sinn.

Positiv ass dogéint, datt méi Better an d'Spideeler kommen, an datt d'Dages-Chirurgie verstäerkt gëtt, fir datt d'Patienten éischter aus der Klinik kommen. Hei wier et awer wichteg selektiv virzegoen, sou den Invité vun der Redaktioun. Dofir misste ganz genee Normen ausgeschafft ginn, wien wéini eraus kënnt, fir datt eng gutt prise en charge fir de Patient garantéiert ass.

D'iwwerfëllten Urgencen ugeschwat, do huet de René Pizzaferri vun der Patientevertriedung erkläert, datt dem Kranken dacks keng aner Adress bleift, well d'Hausdokteren net méi bei een heem kommen, respektiv net méi laang schaffen. Maison médicalë sinn och net déi richteg Léisung, et ginn der net genuch am Land. Dowéinst gëtt driwwer nogeduecht, datt sech Dokteren zesummen dinn, an e Cabinet mat 24 Stonnen Déngscht ubidden.

Dernieft sollen d'Leit als Éischt bei hiren Hausdokter goen.

Beim tiers payant seet de René Pizzaferri, bräichte sech d'Doktere keng Suergen ze maachen iwwert eng Verstaatlechung vun der Medezin, oder datt se méi laang op hir Sue misse waarden. An deene medezinesche Beräicher wou et den tiers payant gëtt, géif et nämlech och keng Retarden ginn, an et wier och vertraglech festgehalen, dat si hir Suen an engem Mount mussen hunn.

A wat deier Parktariffer vun de Kliniken ugeet, do missten d'Regierungsvertrieder an de Verwaltungsréit vun de Spideeler verstäerkt intervenéieren,  sou nach de René Pizzaferri vun der Patientevertriedung.

Invité vun der Redaktioun: René Pizzaferri



Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.