Invité vun der Redaktioun (17. Abrëll)Policedirekter Philippe Schrantz

Mir si gutt opgestallt, ma wann déi Ëmstänn zesummekommen, kënne mir och näischt maachen. Dat war d'Ausso vum Policedirekter Philippe Schrantz.

Invité vun der Redaktioun: Philippe Schrantz (17.04.2018)
Invité vun der Redaktioun um Dënschdeg de Moien ass de Policedirekter

D'Police ass eng Famill a wann een aus enger Famill ewechfält, dann ass dat eng ganz schlëmm Saach, dat sot de Policedirekter Philippe Schrantz um Dënschdeg de Moie bei eis op der Antenn, no den Tëschefäll d'lescht Woch. Nom Doud vun der Policebeamtin Yasmine Grisius wier alles an d'Weeër geleet ginn, fir datt dat net méi geschitt. D'Police wier gutt opgestallt, ma wann déi Ëmstänn zesummekomme wéi an dësem Fall, da kéint een och näischt maachen, sou de Philippe Schrantz.

Generell wier d'Moral an der Police wéinst deem wat geschitt ass net gutt. D'Leit stelle sech ganz vill Froen. D'Policedirektioun géif awer alles maachen, fir déi betraffe Famillen a Beamten z'ënnerstëtzen.
D'Poliziste sinn direkt no de Faite vum interne Service psychologique en Charge geholl ginn, dee soll och de laangfristege Suivi maachen. D'Beamte géifen och déi Zäit kréien déi se brauchen, fir sech erëm, wéi de Philippe Schrantz sot "op hiren zwee Féiss erëmzefannen". Donieft kënne se vun engem juristesche Bäistand profitéieren. De Staat iwwerhëlt d'Affekotekäschten.
De Risiko gehéiert, dem Policedirekter no, zum Beruff dozou. An der Formatioun a beim Material géif gekuckt, fir de Risiko sou kleng wéi méiglech ze halen. Policeschüler géife scho während hirer Formatioun drop virbereet, datt zu all Ament ee bei enger Kontroll fortfuere kann an am schlëmmste Fall probéiert fir iwwert e Polizist ze fueren. Dovunner misst een ëmmer ausgoen.

"Wa geschoss muss ginn, maache mer keng Experimenter"

Wat de Fall zu Bouneweg betrëfft sot de Philippe Schrantz, datt schéissen am Déngscht ëmmer dee leschte Moyen wier. Kee Waffegebrauch, also sou laang et net néideg ass... a wa muss geschoss ginn, da maache mer awer keng Experimenter.
D'Detailer iwwert den Oflaf an zu der Identitéit vum Chauffer huet de Philippe Schrantz keng ginn. Dat géif hien net wëssen.
D'Enquête zu Bouneweg läit den Ament komplett an den Hänn vun der Inspection générale de la Police. Déi regulär Police ass guer net méi domadder befaasst.

"Mir ginn ëmmer dovunner aus, datt ee bei enger Kontroll fortfiert"

Keng Detailer, vun der Säit vum Policedirekter no, wat d'Kollisioun tëscht den zwee Policeween während der Course-Poursuite am Éislek ugeet. De Philippe Schrantz sot just, eng Patrull géif generell nofueren, wann e Verdacht besteet.
Generell géif ee spieren, datt den Zeeche vun der Police net méi onbedéngt Rechnung gedroe gëtt, datt et Leit gëtt déi sech net wëlle kontrolléiere loossen.

Invité vun der Redaktioun: Philippe Schrantz


Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.