Invité vun der Redaktioun (18. Abrëll) - Camille GiraEsou wéi bis ewell kann et net weider goen

Invité vun der Redaktioun um Mëttwoch de Moie war de Staatssekretär am Nohaltegkeetsministère Camille Gira.

Invité vun der Redaktioun: Camille Gira (18.04.2018)
Invité vun der Redaktioun um Mëttwoch de Moie war de Staatssekretär am Nohaltegkeetsministère Camille Gira.

Lëtzebuerg gëtt sech eng nei Landesplanung. Um Mëttwoch de Mëtteg ass an der Chamber eng Consultatiounsdebatt, d'Bierger schaffe mat a regionalen Atelieren an déi 4 plans sectoriels kommen d'nächst Woch an de Regierungsrot a ginn Enn Mee an déi ëffentlech Consultatioun, wou dann d'Leit an d'Gemengen hir Meenung kënne soen.

De Staatssekretär am Nohaltegkeetsministère, de Camille Gira, war um Mëttwoch de Moien eisen Invité vun der Redaktioun. D'Entwécklung déi lescht 30,40 Joer wär schif gelaf, allerdéngs net nëmmen zu Lëtzebuerg. Dofir wär d'Haaptzil vun der Landesplanung déi nächst 30 Joer et besser ze maachen: Wunnen, schaffen an akafe solle beienee réckelen. Et soll ee sech net méi musse fir alles mam Auto deplacéieren. Aarbechtsplaze schafen a keng Wunnengen, dat géif net méi goen. Am ländleche Raum géifen zum Beispill just 5% vun de Leit, déi do wunnen, och do schaffen.

All Decisioun an Zukunft soll also an eng besser Richtung goen, seet de Camille Gira. D'Plans sectoriels sollen dobäi hëllefen...wou gëtt prioritär gewunnt, geschafft, wou gi Stroossen an Eisebunn gebaut a wou gëtt d'Natur geschützt?

De Staatsekretär Gira fënnt, et géif een en Ëmdenke bei de Leit mierken. An d'Regierung hätt och schonn – onofhängeg vun de sektorielle Pläng - Projete lancéiert, op alen Industriefrichen, déi wunnen a schaffe kombinéieren. ZB „Wunne mat der Wolz“, wou 1000 Wunnengen entstinn an awer och 400 bis 500 Aarbechtsplazen.

D'Verwaltungsgeriicht huet rezent Decisioune vun der Ëmweltministesch a Saachen Naturschutz annuléiert

Privatleit krute Recht, déi an hirem Bongert zu Schieren Beem ewech gemaach haten. Fir de Ministère war et awer als Biotop klasséiert an hätt misse geschützt ginn. D'Leit hätten och als Kompensatioun missen nei Beem planzen. D'Geriicht war wéi gesot, domat net d'Accord. De Staatssekretär am Ëmweltministère war e Mëttwoch de Moien eisen Invité vun der Redaktioun an huet op d'Uerteel reagéiert. Déi Leit hätten an den Aen vum Ëmweltministère Beem illegal ewechgemaach. Fein wéi se wieren, hätte se de Leit ugebueden nodréiglech eng Autorisatioun unzefroen. D'Geriicht géif awer elo soen, si hätte sollen e Protokoll maachen, an da wier dat säi Wee gaangen. Wat een elo aus dem Uerteel geléiert hätt, wier, dass et net duergeet, dass iergendwou en Terrain 2008 an de Biotopkadaster als Biotop opgeholl ginn ass, mä wann ee Konflikter hätt, wann et drëm geet ob een Autorisatioune gëtt oder net, da muss een all Kéiers Fall fir Fall klären, ob och haut nach do e Biotop ass, sou de Camille Gira.

De Camille Gira

Datt ee besser muss klären, datt et e Biotop ass, hätt een also elo geléiert. Do géif een d'Demarchen an deem Sënn änneren. Mä um Fong géif d'Uerteel näischt änneren, sou de Camille Gira. Wann e Biotop do wär oder schützenswäert Aarten, géif déi aktuell Virgoensweis weider gëllen.

De Ministère wëll och nach definitiv klären, ob ee géint d'Uerteel an Appell geet oder net. Villäicht misst een och an Zukunft direkt bei enger Illegalitéit e Protokoll maachen an ob de Parquet goen, wat een awer u sech wéilt evitéieren.

Invité vun der Redaktioun: Camille Gira


Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.