Invité vun der Redaktioun (22. Juni) - Pierre GramegnaSteierklass 1a ofschafen, ass simplistesch Iddi

Wann een eng Steierklass sträicht, géif een och nei Ongerechtegkeete schafen. Et misst een deemno oppassen, wat ee mécht, bemierkt de Finanzminister.

Invité vun der Redaktioun: Pierre Gramegna (22.06.2018)
Invité vun der Redaktioun war e Freideg de Finanzminister Pierre Gramegna.
Mir sinn den Ament an enger Walcampagne a mir hunn an der leschter Steierreform der Problematik vun der Steierklass 1a Rechnung gedroen. Mat deene Wieder huet um Freideg de Moien de liberale Finanzminister op d'LSAP-Propos vum Aarbechtsminister Nicolas Schmit reagéiert, fir dës Steierklass fir Wittleit an Allengerzéier komplett ofzeschafen. Dat wier guer net sou einfach. D'Propos vum Nicolas Schmit fir d'LSAP wier simplistesch a géif der Realitéit net Rechnung droen. Dat géif och enorm vill kaschten, och wann et schwéier wier dat auszerechnen. Dem Pierre Gramegna senger Meenung no, misst ee weider op de Wee vun der Individualiséierung goen.

De Pierre Gramegna



Nieft der individueller Besteierung missten dann d'Kanner am Stot a Betruecht gezu ginn, sou de Pierre Gramegna. Dat wier eng Léisung, déi vill méi durabel wier an déi Schrëtt fir Schrëtt sollt agefouert ginn, fir d'Leit net ze schockéieren.
Eng Steierklass ofschafen, géif ganz vill nei Ongerechtegkeeten schafen, fënnt de liberale Minister. Dofir misst een oppassen wat ee mécht.

DP fir weider Hausse vu Crédit d'impôt fir Elengerzéier
D'DP ass awer och der Meenung, datt  bei de Monoparentaux nach méi misst gemaach ginn. Déi Liberal proposéieren, fir relativ séier de Crédit d'impôt fir Elengerzéier, no der Verduebelung bei der leschter Reform, nach emol an d'Luucht ze setzen.

En Donneschdeg hunn d'Eurofinanzministeren am Kader vum Eurogrupp gréng Luucht ginn, fir den Rettungsprogramm fir Griichenland am August auszelafen ze loossen. Eng positiv Nouvelle fir den 20. Anniversaire vun deem Gremium, deen en Donneschdeg zu Senneng gefeiert gouf. Griichenland krit elo nach 15 Milliarden Euro ausbezuelt bis Enn August an da géif den 3. Hëllefsprogramm auslafen. Dann hätt ee kee Land méi, wat an engem Hëllefsprogramm ass, d.h. dass mer d'Kris vun 2008 definitiv iwwerwonnen hunn. Dat géif weisen, dass d'Eurozon funktionéiert.

De Pierre Gramegna



Den Eurogrupp huet en Donneschdeg och iwwert déi däitsch-franséisch Reformproposen fir d'Eurozon diskutéiert. Lëtzebuerg ass, dem Pierre Gramegna no drëm beméit, datt an dëser Fro e Konsens areecht gëtt, datt d'Länner zesumme gefouert ginn. Dowéinst gouf sech bis elo nach net eendeiteg positionéiert. Konkret ass de Grand-Duché all Zäit d'Accord den europäesche Stabilitéitsmechanismus ze stäerken. Prinzipielle Jo och fir méi Solidaritéit tëscht de Länner. Awer net egal wéi, sou de liberale Minister.

Invité vun der Redaktioun: Pierre Gramegna

Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.