Invité vun der Redaktioun (13. Juli) - Jean-Jacques RommesParteien hu sech ugewinnt, d'Leit bei de Pensiounen ze beléien

E Freideg de Moie war de Jean-Jacques Rommes eisen Invité am Studio.

Invité vun der Redaktioun: Jean-Jacques Rommes (13.07.2018)
Den Invité vun der Redaktioun vu méindes bis donneschdes moies géint 8h10 am Studio vun RTL Radio Lëtzebuerg.

Leider hunn d'Parteie sech ugewinnt d'Leit beim Thema Pensiounen ze beléien, well se fäerten, datt deen éischten, deen d'Wourecht seet, d'Quittung kritt. Dat sot de Jean-Jacques Rommes e Freideg de Moien,  deen als Administrateur délégué vun der UEL säi leschte Schaffdag huet. Hie war e Freideg eisen Invité vun der Redaktioun. 

Och wa mer haut kee Problem hunn, géif d'Rentemauer a Wierklechkeet ëmmer méi héich ginn an enges Daags musse mer driwwer klammen, sou de Jean-Jacques Rommes. Duerfir misst haut schonn driwwer geschwat ginn. Déi heite Regierung hätt mat Sécherheet net alles falsch gemaach. Blo-Rout-Gréng hätt vill gemaach a sécher och neie Wand an d'Land bruecht, sou de Patronatsvertrieder, dee 4 Joer un der Spëtzt vun der UEL stoung. Datt net all d'Verspriechen ëmgesat konnte ginn, kéint een der Regierung net virwerfen.

Ugeschwat op de Sozialdialog ënnert der Dräierregierung, deen am Kader vun den Diskussiounen iwwert d'PAN-Gesetz jo och méi hefteg ausgefall ass, huet den Invité vun zwee grondleegende Problemer geschwat. Si hunn eng ganz aner Aschätzung vun de Finances publique an d'Regierung iwwerhëlt d'Aschätzung vum OGBL. Donieft hätt een eng aner Virstellung wéi de Sozialdialog kéint gefouert ginn, den OGBL hätt dat gär um Niveau vum Staat geregelt, den UEL hätt léiwer, d'Gespréicher géifen zesumme mat Patronen a Salariéeën an de Betriber schwätzen.

De Jean-Jacques Rommes



D'Wuesstemsdebatt ass an den Ae vum Jean-Jacques Rommes e bëssen "ausgeglëtscht", wéi e sot. Et kéint een net higoen, an enger Regierung soen, si sollt manner Betriber eranhuelen. Dat wier du "jamais vu", datt eng Diskussioun iwwert de Wuesstem am Walkampf gefouert gëtt, wier awer néideg.

E Sonndeg iwwerhëlt säi Successeur de Jean-Paul Olinger un der Spëtzt vum Daachverband vum Patronat. De Jean-Jacques Rommes bleift weider am Wirtschafts- a Sozialrot an hofft d'nächst Joer kënnen d'Presidence z'iwwerhuelen.

Invité vun der Redaktioun: Jean-Jacques Rommes

Rendez-vous fir den Interview mam Invité vun der Redaktioun all Dag vu méindes bis freides no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.