Invité vun der Redaktioun (23. Oktober) - Alex BodryEt soll och zu personellen Ännerunge kommen

Et wäert, intern gesinn, ganz sécher zu engem Renouveau an der LSAP kommen. Vun de Käpp hir, ma virun allem awer och programmatesch, sou den Alex Bodry.

Invité vun der Redaktioun: Alex Bodry (23.10.2018)
Den Invité vun der Redaktioun vu méindes bis donneschdes moies géint 8h10 am Studio vun RTL Radio Lëtzebuerg.

Mir sinn un der Zuel vu Stëmme gekuckt nach ëmmer déi zweet Partei am Land. Dat sot den LSAP-Fraktiounschef Alex Bodry um Dënschdeg de Moie bei eis op der Antenn. Hie war eisen Invité vun der Redaktioun. Et géif awer näischt ze beschéinege ginn, an et misst een dem Walresultat an d’Aen kucken, wat net gutt wier.

Trotzdeem hätt den Alex Bodry keng Stëmm an der LSAP héieren, déi gesot hätt, dass een elo misst an d’Oppositioun goen.

Déi gréng hätten d’Verloschter vun der LSAP an der DP kënnen opfänken, sou dass eng 3er-Koalitioun global gesinn confirméiert gi wär. Et hätt een zesumme geholl och méi Stëmme kritt wéi nach 2013.

D’Alternativ wier eng CSV-DP-Regierung gewiescht, wat zu enger, Zitat :  „schlechter Politik“ fir d’Land gefouert hätt, mengt den Alex Bodry.

Et wäert, intern gesinn, awer ganz sécher zu engem Renouveau an der LSAP kommen. Vun de Käpp hir, ma virun allem awer och programmatesch.

Wann een déi nächste Walen nees wéilt wannen, da misst ee sech nees méi Kompetenze ginn, sot den Alex Bodry, beispillsweis an der Educatiounspolitik, oder an der Fro vum Wunnengsbau, dem Logement an der Ëmwelt.

Partei-intern wiere schonns gutt Diskussiounen gefouert ginn, déi nächst Wochen a Méint géife weisen, dass et och zu personellen Ännerunge wäert kommen, wéi och während der Legislaturperiod. Richteg konkret wollt den Alex Bodry awer net ginn, mä et soll zu Changementer kommen, fir neien, méi jonke Leit méi Plaz zouzegestoen.

Als rout Linnen an de Koalitiounsverhandlungen, déi um Dënschdeg jo richteg ufänken, huet hien nach emol 3 Haaptfuerderungen ënnerstrach, déi fir d’LSAP kruzial wieren.

Dëst wieren d’Bäibehale vum integralen Index-System, keng Verschlechterunge bei de Pensiounen an och keng Hausse beim Pensiouns-Alter, grad wéi dass eppes misst geschéien, fir géint den Aarmutsrisiko virzegoen – dofir muss den 1. Januar de Mindestloun ëm 100€ netto gehuewe ginn.

Invité vun der Redaktioun: Alex Bodry



Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.