Invité vun der Redaktioun (1. Februar) - Fernand EtgenPoste vum Chamberpresident ass eng grouss Éier

E Freideg de Moie war de Chamberpresident eisen Invité vun der Redaktioun.

Invité vun der Redaktioun: Fernand Etgen (01.02.2019)
E Freideg de Moie war de Chamberpresident eisen Invité vun der Redaktioun.

"Ech hunn et als eng grouss Éier ugesinn, fir dee Posten ze iwwerhuelen. Ech war gär Regierungsmember, mä war och ëmmer oppe fir nei Defien unzegoen."

Dat sot den neie Chamberpresident e Freideg de Moien als eisen Invité vun der Redaktioun.

De Fernand Etgen huet d’Geleeënheet fir éischte Bierger vum Land ze ginn, mat engem Beispill beschriwwen, zu deem den Henri Grethen hien inspiréiert hätt. Heiansdo géif een op engem Bus-Arrêt stoen, a wann de Bus da stoen bleift, da sollt een d’Geleeënheet ergräifen an eraklammen, an de Bus net eidel fortfuere loossen.

De Fernand Etgen

Et wier e Choix gewiescht, deen hien hätt wëllen unhuelen, keng oktroéiert Decisioun.

D’Roll vum Chamberpresident wier eng ganz villsäiteg, an et hätt een och all Dag genuch ze dinn, sou de Fernand Etgen, deen nieft villen internen Dossieren, jo och fir déi representativ Tâche vun der Chamber no baussen zoustänneg ass.

Den interne Fonctionnement vun der Chamber wier iwwerdeems gutt, ma well d’Dossieren ëmmer méi komplex géife ginn, bréicht ee mi dacks extern, wéi intern Expertisen. Dofir huet sech d’Chamber och intern Experte ginn, déi den Deputéierten an de Chamberkommissiounen kënnen zur Säit stoen.

Wat d'Organisatioun vum Referendum iwwer d'Verfassung ugeet, sou géing d'Chamber d'Informatiouns-Campagne ganz seriö ugoen, et wäert een sech professionell berode loossen an et sollt virun allem näischt iwwerstierzt ginn.

An der Suite vun de Chamberleaks géif iwwerdeems un engem neien Informatiksystem geschafft ginn.

Invité vun der Redaktioun: Fernand Etgen


Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.