Thema SpidolsgesetzEt bleift bei verhäerte Fronten tëscht Ministesch an AMMD

Och am Face-à-Face vum Radio e Mëttwoch de Mëtteg sinn d'Gesondheetsministesch an de President vun der AMMD sech net méi no komm.

Face-à-Face mam Lydia Mutsch an Alain Schmit (01.02.2017)
E Mëttwoch de Mëtten nom Journal stounge sech d'Gesondheetsministesch an de President vun der AMMD am Studio vu Radio Lëtzebuerg géigeniwwer.

D'Gesondheetskommissioun vun der Chamber huet während den nächste Wochen dat neit Spidolsgesetz um Programm stoen. Dat ass e komplizéierten Dossier an och vum Volume hier en décke Batz Aarbecht.

Op e Sträit mat den Dokteren hunn d'Deputéiert keng Loscht, mä genee dat kënnegt sech un, well d'Deputéiert en Dënschdeg de Moien nämlech decidéiert hunn, d'Vertrieder vun der AMMD net z'invitéieren. D'Dokteschassociatioun fillt sech extrem iwwergaangen, hir Meenung géif hei net intresséieren, sou de Reproche och un d'Adress vun der Gesondheetsministesch.

D'AMMD huet si eng Konfrontatioun gefrot an d'Lydia Mutsch huet acceptéiert!

Face-à-Face Spidolsgesetz / Résumé Claudia Kollwelter



Et wier een net mat an d'Diskussiounen agebonne ginn, heescht et nach ëmmer vu Säite vum President vun der AMMD, während d'Gesondheetsministesch dat nach ëmmer bestreit. Et hätt een d'Associatioun vun den Dokteren dacks a vill consultéiert, sou d'Ministesch. Fir si ass de Problem kloer, datt d'Form vum Text net dat ass, wat d'AMMD gäre gehat hätt.

D'Doktere fäerten, datt si hir therapeutesch Fräiheet duerch dat neit Gesetz verléieren. Deem wier net esou, seet d'Lydia Mutsch. Deen Deel gouf explizit am Text festgehalen. Just, wat den Traitement ugeet, wäerten Dokteren net méi ganz eleng entscheeden, mä och d'Direktioun an de Virstand vum Spidol hunn do e Wuert matzeschwätzen.

Do läit dann och e weidere Problem fir d'AMMD, well hirer Meenung no wier dëst e Spuergesetz op d'Käschte vun de Patienten, well eben net nëmmen den Dokter méi eleng entscheet, zum Beispill wéi eng Prothees dem Patient agesat gëtt, mä do och d'Direktioun e Wuert matzeschwätzen huet, respektiv dat vun uewen erof kéint diktéieren, präziséiert den Alain Schmit.

Fir d'Ministesch ass et e staarkt Stéck, datt de Vertrieder vun der AMMD dem Staat, den Direktiounen a souguer Dokteren ënnerstellt, aus ekonomesche Grënn de Patienten e mannerwäertegen Traitement ze ginn. De Staat, sou d'Lydia Mutsch, investéiert ronn 35 Millioune Euro am Joer an d'Spideeler an all Joer kommen der dobäi. Dofir wëll een awer hunn, datt d'Patienten alleguerten sou gutt wéi méiglech versuergt a behandelt ginn an et keng Zwouklassemedezin zu Lëtzebuerg soll ginn. An, freet sech d'Ministesch, wier et da falsch, fir op engem Niveau vun héijer Qualitéit ze spueren? Als Beispill huet d'Lydia Mutsch eng Prothees genannt, déi zu Lëtzebuerg 3.000 Euro kéint kaschten, déi selwecht awer an Däitschland just 1.500 Euro. An deem Fall géif een awer och nees net géint d'therapeutesch Fräiheet vun den Doktere goen, mä am Sënn vum Patient schaffen, sou d'Lydia Mutsch.

E wichtege Punkt am neie Gesetz wier d'Opsetze vu Reegelen an de Spideeler, un déi sech och d'Dokteren hale mussen. D'Lydia Mutsch erënnert drun, datt ee 4 grouss Spideeler huet, wou zum Deel iwwer 2.000 Leit schaffen. Do ass et elementar, datt Leit, och wa se e liberale Statut hunn, eng Organisation Interne ka geschéien, déi dat Wuert och verdéngt.

Vill Patiente kloen driwwer, datt wann en Dokter am Congé ass, si net wëssen, wie si dann elo opfänkt. Oder si kréie just en Dossier mat engem Resumé mat, wa se entlooss ginn. Do kann um Niveau vun de Spideeler ganz vill verbessert ginn, seet d'Ministesch. Fir den Alain Schmit ass dat e Beruffsstand un de Pranger gestallt, well si lauter Mëssstänn an de Spideeler opzielt.

D'Ministesch ass sech awer sécher, datt d'Chamber, déi elo iwwer d'Proposition de Loi kuckt, do eng gutt Aarbecht wäert maachen an zesumme mam Avis vum Staatsrot an den aneren Avisen nach e bessert d'Gesetz géif virleeën.

Face-à-Face mam Lydia Mutsch an dem Alain Schmit



RTL.lu: Spidolsgesetz - Kommissioun geet all Artikel vum neie Gesetz eenzel a seriö duerch

RTL.lu: AMMD - "Neie Spidolsplang geet just ekonomeschen Interessien no"

AMMD kritiséiert Projet Spidolsgesetz (27.01.2017)
D'Dokteschassociatioun AMMD seet d'Spidolsgesetz wier um Enn net am Sënn vum Patient.


Spidolsgesetz: Keng Weider Unhéierungen an der Kommissioun (31.01.2017)
Esou wäert een dann och net d'Doktere vun der AMMD ruffen, fir mat hinnen iwwer d'Spidolsgesetz ze schwätzen.


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.