VIDEO: Accord CGFP-RegierungFace-à-face tëscht dem Octavie Modert an dem Dan Kersch

Doriwwer an iwwer villes méi gouf en Donneschdeg op RTL debattéiert.

Face-à-face: Octavie Modert - Dan Kersch (28.06.2018)
D'Octavie Modert an den Dan Kersch souze sech iwwert d'Thema "Accord CGFP-Regierung" géintiwwer. Moderéiert gouf d'Gespréich vum François Aulner.
D'gekierzten Ufanksgehälter beim Staat ginn ofgeschaaft, de Stage gëtt generell vun 3 op 2 Joer gekierzt an d'Iessenszoulag gëtt fir all d'Staatsbeamten ëm 6 Euro an d'Luucht gesat.

Wéi koum et zu deem Accord tëscht der Regierung an der CGFP? Hätt d'CSV eppes anescht gemaach?
Face-à-Face mam Octavie Modert an dem Dan Kersch


Am Face-à-face (Moderatioun: François Aulner) nom Mëttesjournal stounge sech de Minister fir d'Fonction publique Dan Kersch (LSAP) an d'Deputéiert Octavie Modert (CSV) géigeniwwer.

Den Accord mat der CGFP kascht méi wéi 52,7 Milliounen Euro. Am face à face de Mëtteg hei op RTL huet de Minister fir d’Fonction Publique Folgendes erkläert. De Käschtepunkt vum Avenant läich „strukturell“ bei ronn 47 Milliounen Euro, bei déi eng eemoleg Ausgab vu ronn 5 Milliounen Euro dobäi kënnt fir d’Pensiounsrechter ze kompenséiere vun deene Leit déi ënnert d‘80/80/90 Reegelung gefall sinn.


Kersch: „Een dee mat enger Premiere bei de Staat schaffe kënnt, mam Modell 80 Prozent, wann ee seng Netto Paie gekuckt huet, dat wat ënnen erauskënnt, dat ass nämlech dat wat de jonke Mënsch interesséiert, dee louch bei 2.500 Euro. Ass dat dann ze vill?“
De Face-à-face am Resumé/Reportage François Aulner


Dat si just d’Ausgabe vum Staat. Mee dobäi kommen déi vun der CFL, am assimiléierte Secteur a bei de Gemengen. „Traditionell ass et jo sou, datt déi aner Secteuren dann nozéien“, sou den Dan Kersch. Op d’Fro wéi vill et um Enn da wäert kaschten huet de Minister geäntwert: „Dat kann ech zu dësem Moment net soen“.

D’Kritik - vun der CSV ënnert anerem - den Accord vum 15te Juni mat der CGFP wier e Walkaddo, huet den Dan Kersch natierlech net gëlle gelooss.

Modert: „Dat hei ass wahrscheinlech e Walkaddo“

Kersch: „Dat et net an är Walplanung passt, dat kann ech ganz gutt novollzéien.“

Kersch: „Wa mir wéilte Walkaddoe maachen, dann hätte mer déi Kaddoe gemaach déi d’CSV traditionell gemaach huet“

Den LSAP Minister huet drun erënnert, datt wéi de Claude Wiseler zoustännege Minister war, de Punktewäert ëm 3,3% an d’Luucht gaange war. Hei géif een dem Minister no gesinn, dass et OK ass, wann d'CSV esou eppes mécht, wann d'LSAP dat dann awer mécht, wier et e Skandal.

D’CSV-Deputéiert Octavie Modert huet hirersäits puer Mol versicht erauszefanne firwat dann d’Regierung decidéiert hätt elo, sou kuerz virun de Walen en Accord z'ënnerschreiwen, wou dach dee Accord vun 2016 nach net ofgelaf ass. „Mir hu keng Ofschlëss mat enger Gewerkschaft gemaach, 4 Méint viru Wahlen“, esou d'Octavie Modert.

Traditionell hätten d'Parteie kuerz virun de Walen näischt méi mat Gewerkschaften ausgehandelt, dat net méi vun der aktueller Regierung kéint exekutéiert ginn, mee déi nei Regierung dann dohinner geluecht kritt. Ganz kloer e Walkaddo an den An vum Octavie Modert.

Wat d’Erhéijung vun der Iessenszoulag vun aktuell 144 Euro op 204 Euro pro Mount fir all Staatsbeamten ugeet, war den Echange méi eendeiteg, wann och animéiert:

Modert: „Den Här Minister seet ‚mir hei net mat der Strenz geschafft a mir si méi selektiv virgaang‘, dofir huet hie ganz séier hannendrop eppes fir jidderee mat der Strenz mat dobäi gemaach“

Kersch: „Jo, richteg. Wou jiddereen dat selwecht kritt“

Modert: „Voilà“

Kersch: „A net äre Modell vu Punktewäert-Erhéijung, wou déi di vill hunn vill kréien an déi déi wéineg hunn wéineg kréien“:


Modert: „Ok, dir wëllt de Punktewäert ofschafen?“

Kersch: „Iwwerhaapt net!“…


Zur Kritik aus dem privat Secteur, et géing ëmmer méi schwéier gi Leit ze fanne well se all bei de Staat ginn, huet den Dan Kersch behaapt, et wier de Staat deen dacks de Kierzere géing zéien,… well wann e private Betrib wierklech ee braucht, de Betrib déi néideg Suen op den Dësch géing leeën. Weider wieren d’Paie beim Staat net onbedéngt esou héich.

D’Octavie Modert sot weider, et wier Mol interessant genee ze wëssen opgrond vu wéi engen Informatiounen d’Regierung decidéiert huet d‘80/80/90 Reegelung ofzeschafen an de Stage op zwee Joer ze reduzéieren. De Minister sot et hätt eng Dose Reunioune mat all de Cheffe vun den Administratiounen a mat de Gewerkschafte ginn. Jidderee wier der Meenung, datt d’Mesure vun der leschter Regierung kontraproduktiv wieren.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.