RTL-Presseclub vum 18. MäerzChamberLeaks, CSV, Editpress

D'Journalisteronn um Sonndeg de Mueren huet déi national an déi international Aktualitéit aktualiséiert.

Iwwert den neien Editpress-Generaldirekter, ADR- an CSV-Personalien an d'Chamberleaks war am Presseclub rieds.

Eppes méi wéi 6 Joer no de Medicoleaks ass Lëtzebuerg zanter ronn annerhallwer Woch mat de Chamberleaks konfrontéiert. Dës Kéier war net de Sven Clement vun der Piratepartei deen, deen op informatesch Sécherheetsproblemer higewisen huet, mä de Jean-Claude Franck, Chefredakter vum Radio 100,7, a säi Redaktiounskolleg Claude Biver. Si kruten einfach Zougrëff op Dokumenter vum Parlament, déi net accessibel hätte sollen oder däerfe sinn. Am Ufank schwätzt d'Chamber dovun, dass näischt Sécherheetsrelevantes ofgezaapt gi wär; deem war awer net sou! D'Parlament saiséiert um Enn de Parquet, wat d'Journalisten als Aschüchterung verstinn. Huet een et hei mat engem klassesche Fall vu Whistleblowing ze dinn, an hätt d'Chamber net besser gehat, déi eege Feeler kritesch ze hannerfroen, amplaz mat juristesche Schrëtt ze dreeën? Doriwwer hunn nees 4 Journalistekollegen diskutéiert.

Donieft gouf geschwat iwwert d'ADR an d'CSV, déi - fir déi éischt - mam Fred Keup Zoulaf vun "Wee 2050/Neen 2015" kruten an - fir déi zweet - mam Viviane Reding am Zentrum an d'Chamberwale vum Oktober ginn, an iwwert den neie Generaldirekter vun Editpress, Jean-Lou Siweck, dee bis viru kuerzem Chefredakter vum Wort war.

Invitéë waren de Jean-Claude Franck vum Radio 100,7, de Claude Karger vum Journal, de Lucien Montebrusco vum Tageblatt an d'Dany Schumacher vum Lëtzebuerger Wort.

Den RTL-Presseclub vum 18. Mäerz 2018.

De Presseclub héiert Dir all zweete Sonndeg kuerz no 11 Auer op RTL Radio Lëtzebuerg an am Livestream op RTL.lu, wou Dir d'Emissioun dono och an der Rubrik Radio bei den "Emissiounen" fannt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.